年廿八、洗邋遢,記得要執埋雪櫃!食物越積越多,久而久之會發出陣陣異味,假如唔用強烈清潔劑清洗,又可以點幫雪櫃大掃除?跟小編媽媽學識執雪櫃五步曲啦:

第一步:準備天然清潔劑

梳打粉、白醋、鹽、水,都是上好天然清潔劑,超市有售!清潔用品當然不可缺少,毛巾、海綿、牙刷等。集齊所有工具後,就可取出並清理雪櫃內的過期食物,最後拔掉電源。

第二步:「醋鹽水」頑固污漬、油漬

先將層架等配件拆出,小編媽媽就鍾意用天然「醋鹽水」可取代洗潔精清潔,白醋既可除臭,鹽亦可消毒。按次序及1:2:3比例加入,緊記水一定要用冷開水。

用清潔海棉擦拭污漬、油漬,將雪櫃每個角落抹淨後,再用清水抹兩次「過水」。

第三步:通風柵忌濕布抹

通風柵都唔可以忽略,可用吸塵機清理,但絕對不要用濕布抹以免致生鏽!

第四步:牙膏清潔門邊

雪櫃門邊好易有霉菌,可以用牙刷清洗,除了用「醋鹽水」,亦可以用牙膏。緊記清洗後都要用清水「過水」。

第五步:自然辟味劑

雖然市面有很多清潔劑非常方便,但始終化學成分多,用來清潔存放食材的雪櫃未必夠健康。其實檸檬、茶葉及咖啡渣都是天然辟味劑!將泡過的茶葉放置於冰箱內可消除異味,而咖啡渣放置乾燥後放進冰箱,亦可發揮與活性碳類似的除臭吸味功用。至於最常用的當然是檸檬,切開放進雪櫃已可吸除異味。

年廿八大家做個孝順仔女,幫媽媽手一齊執屋執雪櫃啦!

載入中

意見反映
Close popup

你的意見

你的寶貴意見,能讓我們做得更好。請按這次客戶體驗評分:

謝謝!

系統出現錯誤。請稍候再試。

回到頁首