歎冷氣隨時變「細菌密室」?　定期清洗冷氣機慳電又健康

夏天日日三十幾度，準備定部冷氣機，對抗炎夏，但成年無開冷氣，部機一開陣陣霉味傳入鼻超難頂；較到低溫都唔夠凍，唔通冷氣機壞咗，要換新機？

原來唔係！香港人太忙成日唔記得洗冷氣，2018年浸大研究團隊發現人體死皮經抽風裝置進入冷氣機，分解後長期積聚就會傳出臭味*！另外，留喺機身、隔塵網嘅塵埃會減少冷氣機入風量，增加冷氣機製冷時間，令耗電量上升。定期清潔冷氣機，可以助慳電30%**。想慳電節能？學識以下3個清潔冷氣小習慣，今個夏天歎冷氣又涼又安心！

隔咗成年無開冷氣，開冷氣前可以用花灑配清水，清洗隔塵網同外罩嘅塵垢，然後1比99稀釋漂白水，用噴壺消毒冷氣機內部金屬片，噴漂白水後等30至60分鐘，開着風扇功能就可以令漂白水味道變淡。漂白水對機身金屬片影響不大，開冷氣後就會被冷氣機產生嘅水滴帶走，仲可順便清理去水喉位嘅霉菌！

定期清洗隔塵網，最好每2星期洗一次，用花灑向下沖水就OK，記得千祈唔好刷洗隔塵網，隨時會令隔塵網嘅孔變大，影響隔塵功能。

每次開完冷氣，一凍一熱後，無論冷氣機身內外，抑或房內牆身，都會有「倒汗水」，日頭濕熱天氣，成「養菌」好時機，夜晚再開冷氣，細菌就會周圍走。唔想病，記得要勤力用1比99稀釋漂白水清洗風槽隙縫及有倒汗水嘅位置。

最後提提大家，如果冷氣機使用五年以上，自己又無經常清洗，可以趁炎夏嚟到之前搵專業冷氣清洗公司「拆機」，全面清潔一次。

*【教育要聞】浸大研冷氣機傳惡臭 細菌分解皮屑導致|星島教育網 (stheadline.com)

**CLP Liberal Studies (ls-energy.hk)