慳電小貼士 - 變頻冷氣最慳電?揀慳電冷氣機要「啱數」

炎炎夏日經常開冷氣機,部機夠唔夠慳電好重要,唔少人都知道變頻式冷氣嘅慳電效能比定頻冷氣高,但除咗變頻、定頻之外,揀慳電冷氣機仲要考慮咩因素?

匹數

首先一定要揀啱匹數。冷氣機匹數愈大,冷氣機嘅製冷能力愈強。揀冷氣機前,除咗根據空間面積,仲要考慮家居嘅實際環境因素,買部夠匹數嘅型號,例如,面積大概80-100呎嘅房間本來需要1匹冷氣機;如果間房屬於西斜方位,就可能需要大少少嘅匹數喇。

如果你揀嘅係變頻冷氣機,更加要注意唔好揀過細匹數,因為當冷氣機唔夠匹數,為咗維持預定溫度,壓縮機就會不斷運轉,慳唔到電之餘,仲可能嘥多咗電𠻹。

能源標籤級別

根據機電署數據,1級能源標籤嘅冷氣機比3級能源標籤嘅冷氣機,慳大約23%嘅電力,比5級能源標籤嘅冷氣機慳大約43%嘅電力。

以後大家揀冷氣機嗰陣,記得結合實際需要、冷氣機價錢以及慳電程度嚟做比較,選擇最適合你嘅型號喇!

返回頁頂